Pēshānī par bal liye ghoomne wālī laṛkī ko usne nakhrō-e-nāz sīkhā diye,
Sab par āṅkheṅ tān’ne wālī is sarphirī ne tamām hathiyār uske qadamōṅ meṅ rakh diyē.
Anjān! Kahtā hai ki woh merī girift meṅ phir bhī nahīṅ,
Deewānī! Woh to sar-asar usī ke dāyra-e-ḥayāt meṅ hai.
Sau dafa uska nām apnī zabān-e-shauq se letī hai,
Har dafa nām lene tak ke safar meṅ ek ‘umr-e-tamām sī jī letī hai.
Sau dafa woh apnā nām sun kar use baahon meṅ samēt letā hai,
Har dafa apnī taqdīr, apne khauf, aur is dūrī-e-be-rahm se laṛtā hai.
Nādān!! Uskī āṅkhōṅ meṅ apne nām ke timtimātē sitārē na dēkh pāyā,
Fiṭrat-e-parwāna liye woh sochtī hai –
Ke sitārā to roshan andhērē meṅ hī hogā
Ke sitārōṅ ne kab māngā hai nīlā ās̱mān, yā rangīn fizā?
Ke sitārē to apne chānd-e-nūr se hī rang-o-ẓiyā pā lete haiṅ…
Aafreen •
Leave a Reply